काठमाडौँ, फागुन ७ : ‘ह्युमन पापिलोमा भाइरस’ (एचपिभी) खोप अभियान अन्तर्गत चन्द्रागिरि नगरपालिकाका पाँचहजार ६०९ किशोरीले खोप लगाएका छन् । यो खोप ‘कभरेज’को दृष्टिकोणबाट ९०.४२ प्रतिशत रहेको जनस्वास्थ्य शाखा प्रमुख एवं वरिष्ठ जनस्वास्थ्य अधिकृत शम्भुकुमार महतोले जानकारी दिनुभयो ।
खोप अभियान अन्तर्गत कक्षा ६ देखि १० सम्मका सामुदायिक र सस्थागत विद्यालय र विद्यालयबाहिर रहेका १० देखि १४ वर्ष उमेर समूहका करिव ६ हजार २०८ किशोरीलाई एचपिभी खोप लगाइने लक्ष्य राखिएको थियो ।
किशोरीलाई पाठेघरको मुखको क्यान्सरबाट जोगाउन चन्द्रागिरि नगरपालिकाले गत माघ २२ गतेदेखि माघ २९ गतेसम्म अभियान र यसपछि संभावित छुटेका किशोरीलाई खोज पड्ताल मार्फत एचपिभी खोपको पहुँचमा ल्याएको थियो ।
चन्द्रागिरि नगरपालिकाका प्रमुख घनश्याम गिरीले चन्द्रागिरि –४ स्थित चुनदेवी माध्यामिक विद्यालयको खोप केन्द्रमा अभियानको शुभारम्भ गर्नुभएको थियो । खोप अभियानका लागि नगरपालिकाको १५ वटै वडामा ७० वटा खोपकेन्द्रको व्यवस्था मिलाएको थियो ।
जनस्वास्थ्य शाखा प्रमुख एवं वरिष्ठ जनस्वास्थ्य अधिकृत महतोले भन्नुभयो “स्वास्थ्य तथा जनसंख्या मन्त्रालयल देशव्यापी रुपमा माघ २२ गतेदेखि फागुन ६ गतेसम्म) एचपिभी खोप अभियान सञ्चालन गरेको थियो । तर हामीले यो अभियान अन्तर्गत माघ २२ देखि २९ गतेभित्र नै लक्षित किशोरीलाई खोप लगाउने कार्य सम्पन्न गर्ने गरी कार्यतालिका बनाएर कार्यान्वयनमा ल्यायौँ । माघ २९ देखि फागुन ६ सम्म पनि खोजपड्ताल मार्फत खोप लगाउने कार्य जारी रह्यो । खोप लगाउने सबै किशोरीलाई म विशेष धन्यवाद दिन चाहन्छु । अभियानमा साथ र सहयोग गर्नुहुने नगरप्रमुख, उपप्रमुख, प्रमुख प्रशासकीय अधिकृत, वडाध्यक्ष ,ं सबै स्वास्थ्यकर्मी एवं महिलास्वास्थ्य स्वयंसेविकालाई पनि धन्यवाद दिन चाहन्छु ।”
नगरपालिकाले सामुदायिक र सस्थागत दुवै विद्यालयमा, आफ्ना १८ स्वास्थ्य सस्थाका स्वास्थ्यकर्मी मार्फत् खोप लगाउने कार्य मिलाएको थियो । एचपिभी खोप लगाउँदा एचपिभी सङ्क्रमणबाट हुने क्यान्सरलाई घटाउन सहयोग पुग्ने बताइएको छ ।–
