काठमाडौं ,पुस ७ : भन्सार विभागले जारी गरेको पछिल्लो तथ्यांकअनुसार नेपालमा आयात तथा निर्यात दुवै बढेको छ ।
विभागले जारी गरेको मंसिरसम्मको तथ्यांकअनुसार ७ खर्ब ६६ अर्ब १८ करोड रुपैयाँ बराबरको वस्तु आयात भएको छ । यो गत वर्षको आर्थिक वर्षको सोही अवधिको भन्दा १५.८३ प्रतिशत बढी हो ।
यस्तै सोही अवधिमा १ खर्ब १६ अर्ब ५० करोड रुपैयाँ बराबरको वस्तु निर्यात भएको विभागको तथ्यांक छ । यो गत आर्थिक वर्षको सोही अवधिको भन्दा ५८.१७ प्रतिशत बढी हो । विभागका अनुसार फलामजन्य सामग्री कच्चा भटमासको तेल, डिजेल, पेट्रोल, एलपी ग्यास, स्मार्टफोन बढी आयात भएको छ ।
यस्तै नेपालबाट अन्य मुलुकहरूमा प्रशोधित भटमासको तेल, अलैँची, गलैँचा, सूर्यमुखीको तेल, जुटका कपडा, अन्य फेल्टका सामग्री, पाम तेललगायत वस्तु निर्यात भएको छ ।
नेपालबाट निर्यात हुनेभन्दा बढी मूल्यका वस्तु आयात हुँदै व्यापार घाटा बढ्दै गएको छ ।
विभागको तथ्यांकअनुसार ४६ अर्ब ९७ करोडको कच्चा भटमासको तेल आयात भएको छ । ४५ अर्ब ६० करोडको डिजेल आयात भएको छ । यस्तै २७ अर्ब ३३ करोड पेट्रोल आयात भएको छ । २२ अर्ब ३९ करोड खाना पकाउने ग्यास, २१ अर्ब ८४ करोड फलामज्नय सामग्री, १९ अर्ब १३ करोडको स्मार्टफोन बढी आयात भएको छ ।
यस्तै ४६ अर्बको सोयाविन तेल निर्यात भएको छ । ५ अर्ब ५३ करोडको अलैँची, ३ अर्ब ७३ करोडको सनफ्लावर तेल, २ अर्ब ७३ करोडको जुटजन्य सामग्री, २ अर्ब ५८ करोडको गलैँचा निर्यात भएको छ
