काठमाडौँ, फागुन ५ : चन्द्रागिरि नगरपालिकाले नगरपालिकालाई क्षयरोगमुक्त बनाउन विशेष अभियान सञ्चालन गर्ने भएको छ । यसका लागि नगरपालिकाले सबै वडामा विशेष खोज पड्ताल अभियान सञ्चालन गर्न लागेको छ ।
यसैक्रममा क्षयरोगमुक्त नेपाल अभियान घोषणा कार्यक्रम अन्तर्गत चन्द्रागिरि नगरपालिकाका प्रमुख घनश्याम गिरीको अध्यक्षतामा नगरस्तरीय समिति गठन समेत गरिएको छ । सो समितिको एकदिने अभिमुखिकरण कार्यक्रम आज सम्पन्न भएको छ । क्षयरोग केन्द्रका बरिष्ठ जनस्वास्थ्य अधिकृत बसुन्धरा शर्माले कार्यक्रमको सहजीकरण गर्नुभएको थियो ।
कार्यक्रममा नगरप्रवक्ता कृष्णप्रसाद खड्गी, वडा १५ का वडाध्यक्ष एवं सामाजिक विकास समितिका सभापति घनश्याम लुईँटेल , लगायत विभिन्न वडाका वडाध्यक्ष, सामाजिक संघ सस्थाका प्रतिनिधि समेतको उपस्थिति रहेको जनस्वास्थ्य शाखा प्रमुख एवं वरिष्ठ जनस्वास्थ्य अधिकृत शम्भुकुमार महतोले जानकारी दिनुभयो । उहाँका अनुसार नगरक्षेत्रमा हाल १०७ क्षयरोगीले औषधि खाइरहेका छन् । सो अभियान अन्तर्गत करिव ३५६ जना संभावित क्षयरोगीका विरामीलाई उपचारको पहुँचमा ल्याइने छ ।
आजको कार्यक्रममा नगरप्रमुख गिरीले क्षयरोगमुक्त नगरपालिका घोषणा प्रतिवद्धतापत्रमा हस्ताक्षर समेत गर्नुभएको थियो । प्रतिवद्धतापत्रमा नगरप्रवक्ता खड्गी, सामाजिक विकास समितिका सभापति लुईँटेल ,कार्यवाहक प्रमुख प्रशासकीय अधिकृत सुजनराज खनाल लगायतले हस्ताक्षर गर्नुभएको थियो ।
