काठमाडौँ, माघ २१ : आज विद्याकी अधिष्ठात्री देवी सरस्वती पूजा गरेर ‘श्रीपञ्चमी’ पर्व मनाइँदै छ । चन्द्रमाजस्तो गोरो वर्ण भएकी तथा हातमा वीणा र पुस्तक लिएकी विद्याकी देवी सरस्वतीलाई भक्तजनहरूले भारती, शारदा, हंसवाहिनी, जगन्माता, वागीश्वरी, कौमारी, वरदायिनी, बुद्धिदात्री, ब्रह्मचारिणी, चन्द्रघण्टा र भुवनेश्वरीजस्ता नामले पुकार्छन् ।
यसै उपलक्ष्यमा आज राष्ट्रपति रामचन्द्र पौडेल,उपराष्ट्रपति रामसहायप्रसाद यादव, प्रधानमन्त्री केपी शर्मा ओली, प्रधानन्यायाधीश प्रकाशमानसिंह राउत, सभामुख देवराज घिमिरे र राष्ट्रियसभाका अध्यक्ष नारायणप्रसाद दाहाल हनुमानढोका दरबारस्थित नासलचोक जानुभई बिहान ७ बजेर ५५ मिनेटको शुभसाइतमा वसन्त श्रवण गर्नुभएको छ ।
