काठमाडौँ, पुस २६ : चन्द्रागिरि नगरपालिका वडा न १२ स्थित बलम्बु माध्यामिक विद्यालयले बहुप्राविधिक शिक्षालय सञ्चालनको तयारी गरेको छ । यसका लागि दक्षिण कोरियाको ड्रिम सेयरिङ फाउन्डेशनको आर्थिक एवं प्राविधिक सहयोगमा भौतिक पूर्वाधार तयार समेत गरिएको छ । करिव दुईकरोड ६४ लाख रुपैयाँको लागतमा विद्यालय परिसरमा बहुप्राविधिक शिक्षालयका लागि भवन तयार भएको छ ।
फाउन्डेशनको ७० र चन्द्रागिरि नगरपालिकाको ३० प्रतिशत लागतमा भवन तयार भएको बलम्बु माध्यामिक विद्यालयका प्रधानाध्यापक सुमन रावतले जानकारी दिनुभयो । बहुप्राविधिक शिक्षालय पठन पाठनका लागि आवश्यक प्रयोगशाला, सामग्री, फर्निचर तथा औजारहरु धमाधम जडान गरिँदै छ ।
नव निर्वित भवनको आगामी माघ १ गते उद्घाटन गर्ने कार्यक्रम नगरपालिकाले तय गरेको जनाइएको छ । प्राविधिक शिक्षा तथा व्यावसायिक शिक्षा परिषद् (सिटिइभिटी) अन्तर्गतको पाठ्यक्रममा आधारित ब्युटिसियन,इलेक्ट्रिसियन, अटोमोबाइल मर्मत, मोबाइल मर्मत चार विधामा स्नातक तह बराबरको बहुप्राविधिक शिक्षालयमा सीप सिकाइने प्रधानाध्यापक रावतले बताउनुभयो । उहाँका अनुसार बलम्बु माध्यामिक विद्यालयमा साधारण तर्फ कक्षा ९ देखि १२ अध्ययन गरिराखेका विद्यार्थीले आफू रुचिको ती विधा मध्ये एकविधामा अध्ययन गर्न सक्ने छन् । विद्यार्थीले ब्युटिसियन, इलेक्ट्रिसियन,अटोमोबाइल मर्मत र मोबाइल मर्मत पढाइमध्ये एक रोज्नुपर्ने हुन्छ।
विद्यार्थीहरुले कक्षा १२ उत्तीर्ण हुँदा साथमा स्नातक तह बराबरको अध्ययन पूरा गर्न सक्ने जनाइएको छ ।चन्द्रागिरि नगरपालिकाका प्रमुख घनश्याम गिरीले भन्नुभयो '९ कक्षादेखि प्राविधिक शिक्षा पढ्न थालेको विद्यार्थीको १२ कक्षा पास गर्दा एक हातमा शैक्षिक प्रमाणपत्र अर्को हातमा प्राविधिक शिक्षाको । बेरोजगारीको समस्या भोग्नु पर्दैन। हाम्रो उद्देश्य पनि यही हो।'
चन्द्रागिरि नगरपालिकाका प्रमुख प्रशासकीय अधिकृत हेमराज अर्यालले भन्नुभयो 'विद्यालय शिक्षा र व्यवसायिक शिक्षालाई जोड्न र स्वरोजगार बन्न बहुप्राविधिक शिक्षालयबाट सहयोग पुग्ने छ ।
लिखित र सीपमूलक परीक्षा दुवै मार्फत विद्यार्थीको मूल्याङ्कन गरिने जनाइएको छ । गत वर्षको माध्यामिक शिक्षा परीक्षा (एसइई)मा शत् प्रतिशत विद्यार्थी उत्तीर्ण गरेको बलम्बु माध्यामिक विद्यालयमा तीनसय विद्यार्थी अध्ययनरत छन् ।
विद्यार्थीलाई विद्यालय शिक्षासँगै प्राविधिक शिक्षाको पनि सैद्धान्तिक र प्रयोगात्मक ज्ञान हुँदा विद्यालय शिक्षा पछिको समयमा बेरोजगार बस्नुपर्ने समस्याको अन्त्य हुने विश्वास गरिएको छ ।
