काठमाडौं, पुस २४ : संयुक्त बजार अनुगमन टोलीले चन्द्रागिरि नगरपालिका भित्र सञ्चालित केही डेरी, बेकरी तथा दुग्ध पदार्थ पसलमा अनुगमन गरेको छ । चन्द्रागिरि नगरपालिका सहित जिल्ला प्रशासन कार्यालय काठमाडौँ, प्रहरी वृत्त थानकोट र खाद्य प्रविधि तथा गुण नियन्त्रण विभागको प्रतिनिधिको सो अनुगमन टोलीमा सहभागीता रहेको थियो ।
खाद्य प्रविधि तथा गुण नियन्त्रण विभागव्दारा हालै प्रयोगमा ल्याइएको अत्याधुनिक घुम्ति प्रयोगशाला ‘ फुडल्याब भ्यान’ बाट डेरी, बेकरी तथा दुग्धक्षेत्रको अनुगमनमा बिक्री वितरणमा राखिएका दूधको ७, खुवा १, घिउ ५, पनिर १, दही ३ र महको १ गरी कुल १८ थान नमुना संकलन गरी मोबाइल फुड ल्याब भ्यानमार्फत परीक्षण गरिएको थियो ।
निरीक्षण अनुगमन क्रममा एनडीडी कृषि तथा पशुपन्छी फार्म चन्द्रागिरि–१५ मा उपभोग्य मिति गुज्रेका ४ बट्टा दही तथा १ थान लाच्छा पराठा पाइएकामा नष्ट गरेको विभागले जनाएको छ । यस्तै पौडेल डेरी चन्द्रागिरि–१२ को खुला दूधको नमूना परीक्षणमा ‘न्यूट्रलाइजर’ पाइएकाले १२ लिटर नष्ट गरी कारबाही गरिएको विभागले जनाएको छ ।
