काठमाडौं, पुष २४ : शीतलहरका कारण पूर्वपश्चिम राजमार्ग अन्तर्गत नवलपरासी- दुम्किवास-दाउन्ने सडक खण्डमा यातायात अवरूद्ध भएको छ। शीतलहरले सडक हिलाम्मे भएको र सवारीसाधन चिप्लिने कारणले सवारी साधन बाटोमै रोकिएर सडक अवरुद्ध भएको जनाइएको छ ।
लुम्बिनी प्रदेश राजमार्ग सुरक्षा तथा ट्राफिक व्यवस्थापन कार्यालय बुटवलका अनुसार मंगलबार राती साढे १२ बजेदेखि पूर्वतर्फ जाने र पश्चिमतर्फ आउने दुबै तर्फका सवारी साधन सडकमा रोकिएका छन्। शीतलहरका कारण सडकमा चिप्लिने अवस्था भएपछि दाउन्नेबाट पुर्वतर्फ जाने सवारी साधनलाई बाटोमै रोकेर राखिएको लुम्विनी प्रदेश राजमार्ग सुरक्षा तथा ट्राफिक व्यवस्थापन कार्यालय बुटवलका प्रमुख प्रहरी उपरिक्षक श्याम बहादुर खत्रीले जानकारी दिए। ओरालो र अफ्ठ्यारो सडकमा शीतलहर अत्यधिक भएकाले दुर्घटनाको जोखिम भएपछि सवारी साधनलाई गुड्न रोक लगाइएको बताइएको छ ।
जल तथा मौसम विज्ञान विभागको मौसम पूर्वानुमान महाशाखाका अनुसार आज बिहान तराई मधेशका धेरै स्थानहरूमा हुस्सु/कुहिरो लागेकाले जनजीवन, स्वास्थ्य, यातायात तथा हवाई उड्डयन प्रभावित हुन सक्ने भएकाले आवश्यक सावधानी अपनाउन अनुरोध गरिएको छ ।
