कठमाडौँ, पुस १६ : चन्द्रागिरि नगरपालिकाले किशोरीलाई पाठेघरको मुखको क्यान्सरबाट जोगाउन आगामी माघ २२ गतेदेखि खोप अभियान सञ्चालन गर्ने भएको छ ।
यसका लागि नगरपालिकाले किशोरीलाई ‘ह्युमन पापिलोमा भाइरस’ (एचपिभी) खोप लगाउन आवश्यक तयारी गरेको छ । नगरपालिकाका जनस्वास्थ्य शाखा प्रमुख एवं वरिष्ठ जनस्वास्थ्य अधिकृत शम्भुकुमार महतोले खोप अभियान अन्तर्गत कक्षा ६ देखि १० सम्म र विद्यालयबाहिर रहेका १० देखि १४ वर्ष उमेर समूहका करिव ६ हजार २०८ किशोरीलाई एचपिभी खोप लगाइने जानकारी दिनुभयो ।
उहाँले भन्नुभयो “ पाठेघरको मुखको क्यान्सरको जोखिम बढाउने मुख्य कारण ह्युमन पापिलोमा भाइरस सङ्क्रमण रहेकोले त्यसको विरूद्ध खोप लगाउनुपर्ने हुन्छ । स्वास्थ्य तथा जनसंख्या मन्त्रालयको किशोरीलाई एचपिभी खोप लगाउने नीति र अभियान अन्तर्गत चन्द्रागिरि नगरपालिकामा तयारी गरिएको छ । ”
स्वास्थ्य सेवा विभागको आपूर्ति व्यवस्थापन महाशाखाका निर्देशक डा पवनजङ्ग रायमाझीका अनुसार सरकारले आइतबार मात्र चार लाख ९६ हजार दुई सय ८० मात्रा एचपिभी खोप ल्याइएको थियो ।
सरकारले यसभन्दा अघि दुई पटक एचभिपी खोप ल्याइसकेको छ । उक्त खोप टेकुस्थित भण्डारण कक्षमा राखिएको छ । यसअघि ल्याइएका खोपलाई प्रदेश कार्यालयमा पठाइएको र यो खोप पनि प्रदेश कार्यालयमा पठाइने निर्देशक रायमाझीले जानकारी दिनुभयो ।
‘एचपिभी’ खोप र खोपका लागि ‘ग्लोबल एलायन्स’ (गाभी)को सहयोगमा चीनबाट नेपाल ल्याइएको हो । बालस्वास्थ्य तथा खोप शाखाका प्रमुख डा अभियान गौतमले पन्ध्र दिनसम्म चल्ने अभियानअन्तर्गत कक्षा ६ देखि १० सम्म र विद्यालयबाहिर रहेका १० देखि १४ वर्ष उमेर समूहका १६ लाख ८८ हजार नौ सय किशोरीलाई एचपिभी खोप लगाइने लक्ष्य राखिएको बताउनुभयो ।
नेपालमा वार्षिक दुईहजार महिलाको पाठेघरको मुखको क्यान्सरका कारण अकालमा मृत्यु हुने जनाइएको छ । एचपिभी खोप लगाउँदा एचपिभी सङ्क्रमणबाट हुने क्यान्सरलाई ७० प्रतिशतले घटाउन सहयोग पुग्ने बताइएको छ ।
