काठमाडौँ, असोज ८ : बङ्गालको खाडीमा विकसित न्यूनचापीय प्रणालीको प्रभावले काठमाडौँ उपत्यकासहित देशभर वर्षा भएको छ । वर्षासँगै काठमाडौँका सडक, चोक तथा बजार क्षेत्रमा सर्वसाधारणको दैनिकी जनजीवन प्रभावित भएको छ ।
जल तथा मौसम विज्ञान विभाग, मौसम पूर्वानुमान महाशाखाले असोज ८ देखि ११ गतेसम्मका लागि चार दिने मौसम चेतावनी जारी गर्दै देशका विभिन्न भूभागमा भारीदेखि अति भारी वर्षाको सम्भावना औँल्याएको छ । महाशाखाका अनुसार असोज ९ र १० गते देशका विभिन्न क्षेत्रमा अति भारी वर्षाको जोखिम रहेकाले उच्च सतर्कता अपनाउनुपर्ने सुझाव दिएको छ ।
असोज ९ गते बागमती, मधेश तथा कोशी प्रदेशका पश्चिमी भूभागमा अति भारी वर्षाको सम्भावनासहित ‘रेड अलर्ट’ जारी गरिएको छ । असोज १० गते भने भारी वर्षाको प्रभाव पश्चिमतर्फ सर्ने र कर्णाली, लुम्बिनी, गण्डकी तथा सुदूरपश्चिम प्रदेशमा उच्च जोखिम रहने महाशाखाको प्रक्षेपण छ ।
भारी वर्षाका कारण नदीमा जल सतह बढ्नुका साथै बाढी, डुबान, पहिरो तथा गेग्रान बहावको जोखिम रहेकाले आवश्यक सतर्कता अपनाउन महाशाखाले आग्रह गरेको छ ।
नेपाल मौसम विज्ञान विभाग अन्तर्गतको मौसम पूर्वानुमान महाशाखाले बिहीबार राति पाँच प्रदेशमा भारी वर्षाको सम्भावना रहेको बताएको छ ।
महाशाखाका अनुसार बिहीबार राति कोशी, बागमती, गण्डकी र लुम्बिनी प्रदेशको थोरै स्थानमा साथै मधेस प्रदेशको एक, दुई स्थानमा भारीदेखि धेरै भारी वर्षाको सम्भावना छ । मधेस प्रदेश तथा कोशी, बागमती, गण्डकी र लुम्बिनी प्रदेशको तराई भूभागका केही स्थानमा हावाहुरीको समेत सम्भावना छ ।
हाल देशभर कोशी, मधेस, बागमती, गण्डकी, लुम्बिनी र कर्णाली प्रदेशमा अधिकांश बादल लागेको छ भने सुदूरपश्चिम प्रदेशमा आंशिक बादल लागेको छ । यी प्रदेशका धेरै स्थानमा तथा कर्णाली र सुदूरपश्चिम प्रदेशको एक, दुई स्थानमा हल्का वर्षा भइरहेको छ ।
शुक्रबार कोशी, बागमती, गण्डकी, लुम्बिनी र कर्णाली प्रदेशको थोरै स्थानमा भारीदेखि धेरै भारी वर्षाको सम्भावना छ । लुम्बिनी र गण्डकी प्रदेशको एक, दुई स्थानमा अति भारी वर्षाको सम्भावना छ । मधेस प्रदेशको एक, दुई स्थानमा भारी वर्षाको सम्भावना छ भने मधेस तथा कोशी, बागमती, गण्डकी र लुम्बिनी प्रदेशको तराई भूभागका केही स्थानमा हावाहुरीको समेत सम्भावना छ ।
शनिबार गण्डकी, लुम्बिनी, कर्णाली र सुदूरपश्चिम प्रदेशको थोरै स्थानमा भारीदेखि धेरै भारी वर्षाको सम्भावना छ । मधेस प्रदेश तथा कोशी, बागमती, गण्डकी र लुम्बिनी प्रदेशको तराई भूभागका केही स्थानमा हावाहुरीको समेत सम्भावना छ ।
