बाजुरा , असोज ६ : बाजुराको मार्तडी–कोल्टी सडक सुचारु नहुँदा किसानलाई स्याउ ढुवानीमा समस्या भएको छ । जिल्लाको पूर्वी उत्तर क्षेत्रको मार्तडी–कोल्टी सडक विगत पाँच महिनादेखि अवरुद्ध हुँदै गरेपछि यहाँको पाण्डुसैनका किसानलाई स्याउ ढुवानीमा समस्या भएको हो ।
मार्तडी–कोल्टी सडक सुचारु नहुँदा अहिले स्याउ बजार सम्म लान निकै समस्या हुने गरेको बुढीनन्दा नगरपालिका –९ का स्थानीय मानबहादुर रावतले बताउनुभयो ।
उहाँले भन्नुभयो ,“ गत भदौ १५ गते देखि स्याउ टिप्न सुरु गथ्र्यो । अहिले असोज महिनासम्म पनि स्याउ टिपेका छैन । त्यो स्याउ सबै बारीमा थन्किएका छन् ।”
बाटोको पखाईमा स्याउ पाकेर झर्न थालिसके तर यता बाटो खुल्ने नखुल्ने भन्ने बारे केही अत्तो पत्तो नलागेको रावतले बताउनुभयो ।
जिल्लाको हिमाली, स्वामिकार्तिक खापर , जगानाथको स्याउ कर्णाली करिडोर हुँदै सुर्खेत नेपालगञ्ज जाने गरेको भएपनि यता पाण्डुसैनको स्याउ ढुवानीका लागि भने मार्तडी–कोल्टी सडक नै सुचारु हुने पर्ने अवस्था छ ।
स्याउ बिक्री गर्दै दशैँ तिहार खर्चको जोहो गर्ने योजना बनाएका यहाँका स्याउ किसानलाई स्याउ ढुवानी गर्न समस्या भएपछि अहिले उनीहरु चिन्तामा परेका छन् ।
गत भदौको १५ गतेदेखि पाक्न सुरु भएको स्याउ बजारमा नपुग्दै बारीमा कुहिने हो की भन्ने यहाँका किसानलाई चिन्ता परेको हो ।
यता हिमाली स्वामिकार्तिक र जगनाथका किसानले भने एक करोड भन्दाबढीको स्याउ बिक्री गरिसकेका छन् । कर्णाली करिडोर हुँदै देशका विभिन्न सहरमा लिएर स्याउ बिक्री गरेपछि उहाँहरुले करोडौँ आम्दानी गर्नुभएको हो ।
अविरल वर्षाका कारण मार्तडी–कोल्टी सडक सुचारु गर्त समस्या भएको छ । यता अर्को बाउली खोलाको पुन चाँडो निर्माण नहुँदा पनि सडक पूर्ण रुपमा सुचारु गर्न समस्या हुने गरेको भौतिक पूर्वाधार विकास कार्यालय, अछामका जङ्गबहादुर थापाले बताउनुभयो ।
यता बाउली खोलामा पक्की पुल निर्माणका लागि २०७८ कात्तिक १५ गते धनगढीस्थित टीडीआर–जुगलकौशिक जेभीसँग पाँच करोड ५८ लाख ८८ हजार २७० रुपियाँमा ठेक्का सम्झौता भएको थियो ।
सम्झौताअनुसार पुल २०७९ फागुन १५ गतेभित्र निर्माण सम्पन्न हुनुपर्ने थियो । समयमै काम नसकिएपछि सडक डिभिजन कार्यालय अछामले २०८२ फागुन ३० गतेसम्म म्याद थप गरेको थियो । तर थपिएको म्यादमा पनि निर्माण सम्पन्न भएन ।
सो कम्पनीले १ करोड ५५ लाख भुक्तानी लिइसेको छ । काम भने अँझै सम्पन्न नभएको सडक सडिभिजन कार्यालय, अछामका इन्जिनियर सुभाष शाहले बताउनुभयो । उहाँले भन्नुभयो, “ पहिलाको कम्पनीले काम छोडेर गइसकेको छ । अहिले कसिम्म निर्माण सेवा मङ्गलसैनले सो पुलको निर्माणको काम सुरु गरेको छ । ”
