काठमाडौँ, साउन १२: नेपाली काङ्ग्रेसका वरिष्ठ नेता गोपालमान श्रेष्ठको ८३ वर्षको उमेरमा निधन भएको छ।
मङ्गलबार दिउँसो ललितपुरस्थितको जावलाखेलस्थित हेलियस अस्पतालमा उपचारका क्रममा वरिष्ठ नेता श्रेष्ठको निधन भएको नेपाली काङ्ग्रेसका महामन्त्री गुरु घिमिरेले जानकारी दिनुभयो।
पार्टीको कार्यवाहक सभापति, उपसभापतिलगायत विभिन्न भूमिकामा रहेर गरेको योगदान गर्नुभएका श्रेष्ठ क्यान्सर पीडित हुनुहुन्थ्यो । उहाँ विगत १५ दिनदेखि हेलियस अस्पतालको आईसीयूमा उपचाररत हुनुहुन्थ्यो ।श्रेष्ठको पार्थिव शरीरलाई श्रद्धाञ्जलिका लागि बुधबार बिहान सानेपास्थित नेपाली काङ्ग्रेसको केन्द्रीय कार्यालयमा राखिने छ।
श्रेष्ठ स्याङ्जाबाट पटक पटक सांसद निर्वाचित हुनुभएको थियो । । उहाँ भौतिक योजना, वन, उद्योग, शिक्षालगायत मन्त्रीसमेत हुनुभएको थियो । श्रेष्ठ विभिन्न समयमा गरी ५ वर्ष जेलसमेत पर्नुभएको थियो ।
