काठमाडौँ, वैशाख २९ : अर्घाखाँचीको पाणिनी गाउँपालिका–८, दुर्गाफाँट कुडुलेमा आज भएको बस दुर्घटनामा मृत्यु हुनेको सङ्ख्या चार पुगेको छ ।
जिल्ला प्रहरी कार्यालय अर्घाखाँचीका अनुसार दुर्घटनामा दुई जनाको घटनास्थलमै र अन्य दुई जनाको उपचारका क्रममा मृत्यु भएको हो । जिल्ला अस्पताल अर्घाखाँचीमा उपचारका क्रममा मृत्यु हुनेमा कास्की जिल्ला पोखरा महानगरपालिका–१९ निवासी ७८ वर्षीया राममाया बस्नेत रहनुभएको छ । अन्य मृतकको पहिचान खुल्न बाँकी रहेको प्रहरीले जनाएको छ ।
पर्वतबाट अर्घाखाँचीस्थित सुपा देउराली दर्शनका लागि आएको ग १ ख ५०४ नम्बरको बस फर्कने क्रममा अनियन्त्रित भएर दुर्घटनाग्रस्त भएको हो । दुर्घटनामा घाइते भएकामध्ये २० जनाको पाल्पा र ६ जनाको अर्घाखाँची अस्पतालमा उपचार भइरहेको जिल्ला प्रहरी कार्यालयका प्रमुख प्रहरी नायब उपरीक्षक दिवसबहादुर जिसीले जानकारी दिनुभयो ।
प्रहरीका अनुसार घाइतेको उद्धारपछि स्थानीय अस्पतालमा उपचार भइरहेको छ ।
