काठमाडौँ, फागुन ६ : चन्द्रागिरि गरपालिकाले यही फागुन ७ गते पनि नियमिति खोप अभियान जारी रहने र फागुन २१ गतेका सट्टामा फागुन २२ गते खोप लगाइने जनाएको छ ।
नगरपालिकाका जनस्वास्थ्य शाखा प्रमुख एवं वरिष्ठ जनस्वास्थ्य अधिकृत शुम्भुकुमार महतोले फागुन ७ गते प्रजातन्त्र दिवसका अवसरमा सार्वजनिक विदा भएपनि नियमित खोप अभियान जारी रहने तर फागुन २१ मा हुने प्रतिनिधिसभा निर्वाचन दिनका सट्टामा फागुन २२ गते खोप लगाइने जानकारी दिनुभयो ।
गत माघ २७ गतेदेखि चन्द्रागिरि नगरपालिकामा कक्षा ६ मा पढ्ने किशोरी र विद्यालय बाहिर रहेका १० वर्ष उमेर समूहका किशोरीलाई पाठेघरको मुखको क्यान्सरविरुद्धको ‘ह्युमन पापिलोमा भाइरस’ (एचपिभी) एचपिभीखोप लगाउन थालिएको छ ।
पाठेघरको मुखको क्यान्सरको जोखिम बढाउने मुख्य कारण ह्युमन पापिलोमा भाइरस सङ्क्रमण रहेकाले त्यसको विरुद्ध एचपिभी खोप लगाउनुपर्ने हुन्छ । कक्षा ६ मा पढ्ने किशोरीलाई विद्यालय र अन्य किशोरीलाई खोप केन्द्रमा एचपिभी खोप लगाइने छ । चन्द्रागिरि नगरपालिकाका प्रमुख घनश्याम गिरीले एचपिभी खोप लगाउन सबै किशोरीलाई आग्रह गर्नुभयो ।
नेपालमा हरेक दिन औसतमा छ जना महिलामा पाठेघरको मुखको क्यान्सर देखिन्छ, जसमा चार जनाको ज्यान जाने गरेको छ । तर यो क्यान्सर रोग एचपिभी खोपबाट रोक्ने सकिने छ । नेपालमा महिलामा हुने विभिन्न क्यान्सरमध्ये पाठेघरको मुखको क्यान्सर दोस्रो स्थानमा रहेको देखिन्छ भने क्यान्सरको कारणबाट महिलाको मृत्यु हुनेमा यो क्यान्सर पहिलो स्थानमा रहेको छ ।
–––
