कठमाडौँ, असोज २५ : चन्द्रागिरि नगरपालिका स्तरीय वडाकप फुटबल प्रतियोगिताको उपाधि चन्द्रागिरि –१५ तीनथानाले चुमेको छ । नैकाप फुटबल मैदानमा बिहीबार सम्पन्न कडा प्रतिष्पर्धामा चन्द्रागिरि –१५ तीनथानाले चन्द्रागिरि –५ महादेवस्थानलाई २–० ले सहज पराजित गर्दै चन्द्रागिरि अन्तर वडाकप फुटबल प्रतियोगिताको उपाधि कब्जा गरेको हो ।
चन्द्रागिरि –१५ तीनथानाले उपाधिसँगै रु २ लाख २५ हजार नगद सहित मेडल तथा उपविजेता चन्द्रागिरि ५ महादेवस्थानले रु १ लाख १० हजार, ट्रफी र मेडल प्राप्त गरेको छ । प्रतियोगितामा नगरका १५ वटै वडाका टिमको सहभागीता रहेको आयोजकले जनाएका छन् ।
चन्द्रागिरि नगरपालिकाका प्रमुख घनश्याम गिरी , उपप्रमु बसन्ती श्रेष्ठ , काठमाडौं जिल्ला खेलकुद विकास समितिका अध्यक्ष भाइकृष्ण बलामी विजेता , उपविजेतालाई नगद, ट्रफी र मेडल प्रदान गर्नुभयो ।
सो अवसरमा नगर प्रमुख गिरीले नगरपालिकाले नगरभित्र विभिन्न खेलकूद विकास र प्रवद्र्धन गर्न उच्च प्राथमिकता दिएको जानकारी दिनुभयो । उहाँले सन् २०३० सम्म दिगो विकास लक्ष्य हासिल गर्न र यसलाई स्थानीयकरण गर्न नगरपालिकाले ‘भिएलआर’ प्रतिवेदन तयार पारेको जानकारी दिनुभयो ।
नगर प्रमुख गिरीले भन्नुभयो, “दिगो विकास लक्ष्यमध्ये शिक्षा, स्वास्थ्य, लैङ्गिक समानता, खानेपानी तथा सरसफाइ, सुरक्षित, सुन्दर र सबैको पहुँचयोग्य सहरजस्ता लक्ष्यलाई स्थानीयकरण गर्न नगरपालिकाले अवलम्बन गरेका असल अभ्यासलाई प्रतिवेदनमा समावेश गरिएका छन् । अब नगरपालिकाले प्रतिवेदनलाई संयुक्त राष्ट्रसङ्घमा शीघ्र प्रस्तुत गर्छ । सहरीकरणसँग सम्बन्धित तथ्याङ्क व्यवस्थापनलाई दिगो विकास लक्ष्यको मापनसँग जोड्न नगरपालिकाले उच्च प्राथमिकतामा राखेको छ ।”
