काठमाडौँ, असोज ३ : भदौ महिनामा झन्डै ६० हजार मेट्रिक टन ग्यास आयात भएर खपत भएको नेपाल आयल निगमले जनाएको छ ।
निगमका अनुसार भदौ महिनामा ५९ हजार ८३३ मेट्रिक टन ग्यासको ४२ लाख १३ हजार ६६१ सिलिन्डर वितरण गरिएको हो । सामान्य अवस्थामा मासिक ३० लाख देखि ३५ लाख संख्यामा ग्यास सिलिन्डर खपत हुने गरेकोमा बजारमा ग्यासको अभाव कम गर्न ४२ लाख सिलिन्डर वितरण गरिएको हो ।
गत साउनमा ४० लाख ३६ हजार ३६४ सिलिन्डर बिक्री गरेको र असारमा ३१ लाख ३६ हजार ९३७ सिलिन्डर वितरण भएको निगमले जनाएको छ ।
बजारमा ग्यासको चरम अभाव भएपछि आपूर्ति व्यवस्था सहज बनाउन ग्यासको कोटा बढाएको निगमले जनाएको छ । सामान्य अवस्थामा मासिक ४५ हजार मेट्रिक टन देखि ४८ हजार मेट्रिक टन ग्यासको माग रहेकोमा बजारमा ग्यासको अभाव भएपछि आपूर्ति बढाएको निगमले जनाएको छ ।
उपत्यकामा दैनिक ४० हजार संख्यामा सिलिन्डर खपत हुने गरेकोमा मुख्य राजमार्ग खुुला भएसँगै आपूर्ति व्यवस्था सहज हुुँदै गएको निगमले जनाएको छ ।
बिहीबारदेखि पृथ्वी राजमार्ग खुला भई दुुईतर्फी सवारी साधन सञ्चालनमा आएको छ । त्यससँगै ग्यासका बुलेट आउन थालेपछि ग्यासको अभाव क्रमशः कम हुुँदै जाने निगमले जनाएको छ ।
नियमित रूपमा ग्यास आउन थालेको र उद्योगीले काठमाडौँ आसपासका उद्योगबाट ग्यास रिफिलिङ्ग गरी बजारमा पठाउन थालेका आवश्यकता भन्दा बढी सिलिन्डर खरिद नगर्न निगमले उपभोक्ताले अनुरोध गरेको छ ।
पश्चिम एसियाली मुलकुमा भएको युुद्धको कारणले आपूर्तिमा समस्या भई बजारमा ग्यास अभाव हुन थालेपछि गत फागुन २८ गतेदेखि चार महिना आधा तौलको सिलिन्डर वितरण गरेको थियो ।
असार ३१ गतेदेखि भने पूर्ण तौलको सिलिन्डर बिक्री गर्न थालेपछि बजारमा ग्यासको अभाव थप चुलिदैँ गएको थियो । तीन साता अघि कृष्णभिरमा गएको पहिरोको कारणले मुख्य राजमार्ग अवरूद्व हुुँदा ग्यासको आयात कम भएपछि ग्यासको अभाव उच्च भएको थियो ।
यसैबिच शुुक्रबार काठमाडौँ उपत्यकामा चार वटा ग्यास उद्योगले पाँच हजार एक सय दुई वटा सिलिन्डर बिक्री गरेको निगमले जनाएको छ ।
