काठमाडौं, असोज १८ : राष्ट्रिय विपद् जोखिम न्यूनीकरण तथा व्यवस्थापन प्राधिकरणले ७७ वटै जिल्ला प्रशासन कार्यालयहरुलाई बाटोमा रोकिएका यात्रुहरुको व्यवस्थापन सम्वन्धमा परिपत्र गरेको छ ।
उक्त परिपत्रमा देशका विभिन्न भागमा चट्याङसहित भारीदेखि अति भारी वर्षा भइरहेको र सोको कारण उत्पन्न हुनसक्ने बाढी, पहिरो र डुबानजन्य विपद्लाई दृष्टिगत गरी सबै जिल्लाबाट चल्ने लामो दूरीका सवारी साधनको आवतजावतमा असोज २० गते सोमबारसम्म रोग लगाइएकोले सूचना जारी हुनुअघि नै गन्तव्यतर्फ प्रस्थान गरेका केही सवारी साधनहरु बाटोमा रोकिन गई त्यसमा सवार यात्रुहरुमा समस्या परेकाले उनीहरुका लागि सम्वन्धित स्थानीय तह, यातायात व्यवसायीहरु एवं जिल्लामा कार्यक्षेत्र भएका सरकारी तथा गैरसरकारी संघ संस्था, निजी क्षेत्र लगायतसँगको समन्वयमा सुरक्षित स्थानमा राख्दै खानपान, स्वास्थ्योपचार लगायतका आवश्यक बन्दोबस्त गर्नु, गराउनुहुन निर्णयानुसार अनुरोध गरिएको छ ।
