काठमाडौँ, असार २० : नागढुङ्गा–सिस्नेखोला सुरुङमार्ग आयोजनाले सञ्चालनको अन्तिम तयारीमा रहेको सुरुङमार्ग सञ्चालनका लागि निर्देशिका तयार भइरहेको जनाएको छ । मुलुकको यातायात पूर्वाधार क्षेत्रमा आधुनिक सवारीसाधन गुड्ने सुरुङमार्ग सञ्चालन नयाँ प्रयोग भएको हुनाले यसका लागि निर्देशिकै तयार गर्नु परेको आयोजनाले जानकारी दिएको छ ।
आयोजनाका प्रमुख सञ्जय पन्थीले ‘सेवाप्रदायकमार्फत सार्वजनिक पूर्वाधार सञ्चालन, व्यवस्थापन तथा मर्मत सेवा खरिद गर्नेसम्बन्धी निर्देशिका’ तयार गरिरहेको जानकारी दिनुभयो । सुरुङमार्ग सञ्चालन गर्न सेवाप्रदायक संस्था छनोट प्रक्रिया सुरु गर्न आवश्यक कागजपत्र तयार गरी राय सुझाव तथा स्वीकृतिका लागि भौतिक पूर्वाधार तथा यातायात मन्त्रालयमा पेस गरिएको पन्थीले जानकारी दिनुभयो ।
