काठमाडौं,जेठ ९ : लागुऔषध विरुद्धको महाअभियान अन्तर्गत चन्द्रागिरि नगरपालिकामा आजदेखि लागुऔषध दुर्व्यसन रहित घर अभियान शुरुआत गरिएको छ । चन्द्रागिरि नगरपालिका, काठमाडौं उपत्यका प्रहरी कार्यालय रानीपोखरी र नेपाल औषधी व्यवसायी संघ काठमाडौंको संयुक्त साझेदारीमा यस अभियान अन्तर्गत हरेक घरमा लागुऔषध दुर्व्यसन विरुद्धको स्टिकर टाँस गर्ने काम शुरुआत गरिएको छ ।
चन्द्रागिरि नगरपालिकाका प्रमुख घनश्याम गिरी, उपप्रमुख वसन्ती श्रेष्ठ, काठमाडौं उपत्यका प्रहरी कार्यालय रानीपोखरीका प्रमुख प्रहरी अतिरिक्त महानिरीक्षक टेक बहादुर तामाङ, प्रहरी परिसर काठमाडौंका प्रमुख प्रहरी वरिष्ठ उपरिक्षक विश्व अधिकारी, सोही कार्यालयका प्रहरी वरिष्ठ उपरिक्षक नवराज अधिकारी, नेपाल औषधी व्यवसायी संघ काठमाडौंका अध्यक्ष शंकर महर्जन र राष्ट्रिय कलाकार दिपकराज गिरीले सो अभियानको शुभाराम्भ गर्नुभयो ।
