काठमाडौँ, फागुन २७ : चन्द्रागिरि नगरपालिकाले ‘बालश्रममुक्त वडा’ घोषणा कार्यक्रमलाई उच्च प्राथमिता दिएको छ । यस क्रममा आज चन्द्रागिरि नगरपालिकाको वडा नं ८ मातातीर्थलाई बालश्रममुक्त वडा घोषणा गरिएको छ ।
नगरपालिकाले बालश्रम मुक्त स्थानीय तह घोषणा कार्यबिधि २०७५ को लक्ष्य अनुरुप बालश्रम निवारणको लागि बालश्रम मुक्त स्थानीय तह घोषणा कार्यबिधि २०७७ अबलम्बन गर्दै बालश्रम निवारणसम्बन्धी कार्ययोजना बनाई बालश्रम मुक्त नगर तथा बडा निर्माणका लागि विविध कार्यक्रम सञ्चालन गरिरहेको छ ।
‘बालबालिकालाई श्रममा प्रयोग नगरौँ, बालश्रममुक्त समाजको निर्माण गरौँ’ भन्ने मूल नारासहित नगरको १५ वडामध्ये वडा नं ३ थानकोट र वडा नं १४ नयाँ नैकापलाई बालश्रममुक्त वडा घोषणा गरिसकिएको छ । बालबालिकासम्बन्धी बालमैत्री स्थानीय शासन कार्यविधि, २०६८ ले ३९ वटा सूचक पूरा गरेको अवस्थामा बालश्रम घटेको हुनुपर्ने उल्लेख छ ।
चन्द्रागिरि नगरपालिकाका प्रमुख घनश्याम गिरिले भकुण्डेचौरमा आज आयोजित कार्यक्रममा ‘बालश्रम मुक्त वडा घोषणा पत्र’घोषणा गर्दै बाश्रम निवारणका लागि नगरपालिकाले उच्च प्राथमिकता दिँदै आएको जानकारी दिँदै घोषणा पछिको दीगोपनमा काम गर्नुपर्छ भन्नुभयो ।
कार्यक्रममा उपप्रमुख बसन्ती श्रेष्ठ, प्रमुख प्रशासकीय अधिकृत हेमराज अर्याल, वडा ८का वडा अध्यक्ष प्रल्हाद रिजाल, शिक्षा, युवा तथा खेलकूद शाखाका प्रमुख सृजन खनाल, प्रशासन शाखाका प्रमुख दामोदर रिजाल, आर्थिक प्रशासन प्रमुख लेखा अधिकृत महेशदत्त भट्ट, सामाजिक विकास शाखाका प्रमुख रश्मी श्रेष्ठ लगायतको सहभागीता रहेको थियो ।
सो अवसरमा चन्द्रागिरि –का वडाध्यक्ष रिजालले बालश्रम मुक्त घोषणासम्म आइपुग्न पु¥याइएको साथ र सहयोगप्रति वडावासीलाई धन्यवाद दिँदै यसको दीगोपनका लागि भविष्यमा काम गर्ने जानकारी दिनुभयो । यस अगाडि गौथलीचोकबाट बाजागाज सहितको निस्केको ¥याली भकुण्डेचौरमा घोषणासभामा परिणत भएको थियो । सो अवसरमा कार्यक्रममा सहभागीले ‘चन्द्रागिरि नगरपालिका , ८ नं वडा, काठमाडौँलाई बालश्रम मुक्त घोषणा गरी हामी नगरपालिकाका जनप्रनिधि, विषयगत समिति, विद्यालय, बालक्लव, सञ्चारकर्मी, उद्योग व्यवसायी, संघसस्था तथा सरोकारवालाहरु बालश्रम मुक्त वडालाई नियमितता दिन र बालश्रम निवारण गर्न प्रतिवद्धछौ’भन्ने घोषणापत्रमा हस्ताक्षर समेत गर्र्नुभएको थियो ।
अन्तर्राष्ट्रिय श्रम सङ्गठनका (आइएलओ) को प्रतिवेदनअनुसार नेपालमा पाँचदेखि १७ वर्ष उमेर समूहका ७० लाख बालबालिकामध्ये ११ लाख बालश्रममा संलग्न छन् । १३ वर्ष उमेर समूहसम्मका बालबालिकाको संलग्नता १८ प्रतिशत रहेको छ भने १४ देखि १७ वर्ष उमेर समूहका १० प्रतिशत बालबालिका श्रममा छन् । बालकभन्दा बालिका श्रममा बढी रहेको जनाइएको छ । चौध प्रतिशत बालक र १७ प्रतिशत बालिका श्रममा रहेका हुन्छन् ।
–––
