हेटौँडा, भदौ ४ : बागमती प्रदेशका नवनियुक्त मुख्यमन्त्री किरण थापा मगरले पद तथा गोपनीयताको शपथ ग्रहण गर्नुभएको छ । हेटौँडास्थित प्रदेश प्रमुखको कार्यालयमा आज आयोजित समारोहमा प्रदेश प्रमुख दीपकप्रसाद देवकोटाले मुख्यमन्त्री थापालाई पद तथा गोपनीयताको शपथ गराउनुभएको हो ।
उहाँ नेपालको संविधानको धारा १६८ को उपधारा (२) बमोजिम मुख्यमन्त्री नियुक्त हुनुभएको हो । नेपाल कम्युनिष्ट पार्टी (एमाले), नेपाली कम्युनिष्ट पार्टी (नेकपा) र राष्ट्रिय प्रजातन्त्र पार्टी (राप्रपा)को समर्थनमा मुख्यमन्त्री बन्नुभएका थापालाई ६३ प्रदेशसभा सदस्यको समर्थन रहेको छ । उहाँलाई एमालेका २५, नेकपाका २६ र राप्रपाका १२ प्रदेशसभा सदस्यले समर्थन गर्नुभएको हो ।
एमालेका भरत केसी (भौतिक तथा पूर्वाधार मन्त्रालय) , ज्ञानबहादुर तामाङ (बिनाविभागीय मन्त्री ) , नेकपाका सरल सहयात्री पौडेल (आर्थिक मामिला तथा योजनामन्त्री) , राप्रपाका राजु विष्ट (खानेपानी), गिरबहादुर तामाङ (स्वास्थ्य तथा सामाजिक विकासमन्त्री) र राजेन्द्र प्रजापति (उद्योग, पर्यटन, श्रम तथा रोजगार मन्त्रालय)को जिम्मेवारी दिइएको छ ।
