काभ्रेपलाञ्चोक, भदौ १ : काभ्रेपलाञ्चोक जिल्लाको खानीखोला गाउँपालिका –१ स्याउरेथलीमा बोलेरो गाडी दुर्घटना हुँदा दुई जनाको घटनास्थलमा मृत्यु भएको छ । चार जना घाइते भएका छन् ।
खानीखोलाको जगथलीबाट बनेपातर्फ आउँदै गरेको बा २१ च २४२ नम्बरको गाडी दुर्घटना हुँदा दुई जनाको मृत्यु भएको हो। खानीखोला गाउँपालिकाका अध्यक्ष इन्द्रबहादुर थिङका अनुसार दुर्घटनामा मृत्यु हुनेमा खानीखोला गाउँपालिका –४ का कलकबहादुर माझी र खानीखोला गाउँपालिका –२ सार्कीडाँडाकी अनिता मोक्तान रहेको बताउनुभयो ।
उहाँले दुर्घटनामा चार जना घाइते भएको र उहाँहरुको हेलिकप्टरमार्फत उद्धारको प्रयास भए पनि मौसम खराबीको कारण हेलिकप्टर ल्याण्ड हुने अवस्था नरहेपछि घाइतेहरुलाई स्थलमार्गमार्फत जिल्लामा ल्याइरहेको बताउनुभयो । उहाँले दुर्घटनामा खानीखोला –५ का बहुतमान रुम्बा, वडा नम्बर–३ का प्रदिप जर्घामगर, सिन्धुपाल्चोकका धनपति रावल र बनेपा साँगाका राहुल तामाङ गम्भीर घाइते भएको बताउनुभयो ।
जिल्ला प्रहरी कार्यालय काभ्रेपलाञ्चोकका सूचना अधिकारी प्रहरी नायव उपरीक्षक रबिन बिष्टले सोमबार बिहान साढे ११ बजे बोलेरो गाडीको ब्रेक फेल भइ सडकबाट अन्दाजी दुईसय मिटर तल खसेको बताउनुभयो । उहाँले घाइतेको उद्धार गरी उपचारका लागि धुलिखेलतर्फ ल्याइएको बताउनुभयो।
